D’lescht Woch hate mir d’Geleeënheet, eng MEGA-Woch an der Grondschoul zu Schëtter z’organiséieren. D’Zil? De Kanner e Raum fir Reflexioun an Austausch ze bidden iwwer wichteg Theme wéi Gläichberechtegung, Stereotyppen a sozial Relatiounen.
D’Iddi hannert dësem Projet ass et, dës Atelieren all Joer fir déi selwecht Altersgruppe mat de selwechte Sujeten unzebidden, sou datt d’Kanner am Laf vu 4-5 Joer all Theme virun hirem Iwwergang an de Secondaire kenneléieren.
E Programm, ugepasst un all Altersgrupp
Mir haten d’Chance, all d’Klassen aus de follgende Joergäng ze treffen, mat Themen, déi speziell op hir Entwécklung ofgestëmmt waren:
- 2.2 (ongeféier 8 Joer): Liesung vum Buch „Lauschter op däin Häerz“, e Buch vum Ministère, dat d’Wichtegkeet vu Chancen an der perséinlecher Entwécklung erkläert.
- 3.2 (ongeféier 10 Joer): Interaktiven Atelier iwwer Stereotyppen, Geschlechterrollen an Diskriminatioun.
- 4.1 (ongeféier 11 Joer): Atelier iwwer haislech Gewalt, fir d’Kanner op dëse sensibele Sujet opmierksam ze maachen (ugebuede vum Service Log-In).
- 4.2 (ongeféier 12 Joer): Atelier an Diskussioun iwwer Geschlechterrollen a sozial Medien, e Sujet, deen ëmmer méi an hirem Alldag präsent ass.
Eng beräicherend Erfarung fir jiddereen
D’Klassen an d’Léierpersonal ware fantastesch an enorm oppe fir d’Themen. Hiert Engagement an hir Oppenheet hunn dës Gespréicher immens bereechert. D’MEGA-Team huet och sou munches bäigeléiert déi Woch!
Duerch dës Initiative all Joer, schaffe mir un enger Generatioun vu Jonken, déi méi informéiert a sensibiliséiert an de Secondaire starten.
E grousse Merci un all d’Schülerinnen an d’Schüler souwéi d’Léierpersonal fir hir aktiv Participatioun an hir Oppenheet!